لیست تایید و عدم تایید/ کارمندان پوهنتون دایکندی

9 ساعتونه 6 minutes ago

الحمدلله رب العالمین، الصلاة والسلام علی أشرف الأنبیاء والمرسلین، زموږ پر سیدنا محمد، د هغه پر آل، صحابه او پر هغو کسانو چې تر قیامت پورې یې په نېکۍ سره پیروي کړې وي.

اما بعد: پوهنتونونه د هېواد له بنسټیزو تحصیلي بنسټونو څخه دي چې د افغانستان د اسلامي امارت د لوړو زده کړو وزارت د محترم مقام د لارښوونو تر سیوري لاندې، د هېواد د بچیانو د روزنې او زده کړې او د نننیو ټولنو د کار بازار د غوښتنو پر بنسټ د هغوی د بشري ځواک په توګه د وړاندې کولو لپاره، په بشپړې ژمنتیا او هڅې سره فعالیت کوي. له بلې خوا، د هېواد تحصیلي بنسټونه د افغانستان د اسلامي امارت د دولت د موخو د تحقق لپاره د اقتصادي، ټولنیز او فرهنګي پرمختګ په برخه کې هم اساسي دنده پر غاړه لري؛ لکه څنګه چې په وروستیو کلونو کې د لوړو زده کړو وزارت رهبرۍ د تحصیلي بنسټونو د کیفي ودې لپاره د لوړو زده کړو د نظام د بیارغونې په موخه نه ستړې کېدونکې هڅې کړې دي، څو پوهنتونونه وکولای شي د ټولنې د مخ پر زیاتېدونکو اړتیاوو ځواب ووایي او ځانونه د پوهنتونونو د درېیم نسل، چې پرمختللو ټولنو ورته لاسرسی موندلی، تر کچې ورسوي. له شک پرته، د ډېرو کلونو لپاره د هېواد تحصیلي بنسټونه د لومړي نسل په کتار کې، چې اساساً سندمحوره دي، پاتې شول؛ په داسې حال کې چې نن د هېواد یو شمېر تحصیلي بنسټونه دویم نسل (علم‌محور) ته رسېدلي او د اوسني وضعیت له مخې به ډېر ژر د هېواد د پوهنتونونو درېیم نسل، یا تولیدمحور نسل، شاهدان واوسو، چې د تولید، صنعت او اقتصاد د پیاوړتیا په برخه کې به اساسي رول ولوبوي او د خلکو په ژوند کې به د مثبت بدلون سبب شي.

له شک پرته، د لوړو زده کړو وزارت د اسلامي امارت د رهبرۍ هڅې بې‌اغېزې نه دي پاتې شوې او موږ نن د تېرو کلونو په پرتله د هېواد د لوړو زده کړو په تحصیلي بنسټونو کې د کیفي بدلون او پراختیا شاهدان یو. که څه هم له کمیتي پلوه د هېواد تحصیلي بنسټونو او په تعقیب یې د تحصیلي پروګرامونو زیاتوالي په تېرو ۲۰ کلونو کې بې‌سارې کمیتي وده کړې ده، خو باید هېره نه کړو چې یوازې کمیت ته پاملرنه موږ هغو اساسي موخو ته نه شي رسولای چې هغه د کار بازار د غوښتنو او د ټولنې د اړتیاوو پر بنسټ د بشري ځواک روزنه او وړاندې کول دي. له نېکه مرغه، نن هغه څه چې د لوړو زده کړو وزارت د رهبرۍ او د هېواد د تحصیلي بنسټونو د پاملرنې وړ ګرځېدلي، د لوړو زده کړو د تحصیلي بنسټونو کیفیت ته پاملرنه ده او د اړوندو کارکوونکو د هڅو او کوښښونو په پایله کې د لوړو زده کړو د تحصیلي بنسټونو کیفیت ته د پاملرنې په اړه ارزښتناک ګامونه پورته شوي دي، چې د پام وړ بریاوې یې له ځان سره لرلې دي. له دغو لاسته راوړنو څخه د کیفیت لوړونې او اعتبار ورکونې آمریت لپاره د خپلواکو بستونو رامنځته کول، د کیفیت لوړونې او اعتبار ورکونې د کمېټو د دندو د لایحې تدوین، د علمي پروګرامونو د بیاکتنې (APR) تطبیق، مالي ملاتړ، د زیربنایي پروژو تطبیق، د علمي خپرونو او مجلو ملاتړ او د استادانو د ماسټرۍ او دوکتورا بورسونو ته استول یادولای شو، چې دغه ګامونه د کیفي ستراتیژیکو موخو د تحقق لپاره د تحصیلي بنسټونو د علمي پرمختګ تضمین کېدای شي.

دایکندی پوهنتون، چې د دایکندی ولایت په مرکز، نیلي ښار کې موقعیت لري، په هېواد کې له نویو تأسیس شویو او د ودې په حال کې پوهنتونونو څخه یو دی او د لوړو زده کړو وزارت د لوړو موخو د ترلاسه کولو لپاره د کیفیت د تضمین د پروګرامونو د اجرا او تطبیق لپاره ځان ژمن بولي او د علمي، اکادمیکي، ښوونیزو، څېړنیزو او خدماتي پروګرامونو د معیاري کولو په لور د ملي او نړیوال اعتبار د ترلاسه کولو لپاره، د یوه معیاري تحصیلي بنسټ په توګه هڅې کوي. د همدې لیدلوري له مخې، د پوهنتون رهبرۍ او د کیفیت لوړونې او اعتبار ورکونې محترم آمریت په صادقانه توګه هڅه کړې ده، څو د پوهنتون ټولې برخې او پروګرامونه د کیفیت لوړونې او اعتبار ورکونې له معیارونو سره برابر کړي؛ تر څو د بیاکتنې د هیئت د ارزونې او بیاکتنې لپاره چمتو وي.

له دې لارې د لوړو زده کړو د محترم وزارت د هڅاند ټیم له هر اړخیز ملاتړ څخه د کیفیت لوړونې او اعتبار ورکونې د پروګرامونو د تطبیق په برخه کې مننه او قدرداني کوم؛ همدارنګه له خپلو قدرمنو همکارانو څخه په محترمو علمي، مالي او اداري معاونیتونو کې، د محترمو پوهنځیو له ریاستونو، د کیفیت لوړونې او اعتبار ورکونې له محترم آمریت، اړوندو کمېټو او ټولو هغو عزیزانو څخه چې د ۱۴۰۱ کال د دایکندی د لوړو زده کړو مؤسسې د ځان‌ارزونې راپور د تنظیم او ترتیب په برخه کې یې زحمت ایستلی دی، مننه او قدرداني کوم او د هغوی د لا زیاتو بریاوو غوښتنه د اقدس الهي له دربار څخه کوم.